عقیل عباس جعفری
محقق و مؤرخ، کراچی
بی بی سی اردو 24 فروری 2022 ء
ایوب خان کو اسلام آباد شہر کی سائٹ پر نقشوں کی مدد سے بریفننگ دی جا رہی ہے
ایوب آباد، ایوب پور، ایوب نگر، الحمرا، اقبال پوٹھوہار، پارس، پاک ٹاؤن، پاک مرکز، پاک نگر، جناح، جناح آباد، جناح برگ، جناح پور، جنت نشان، خانہ آباد، دارالامن، دارالامان، دارالسلام، دارالجمہور، دارالفلاح، حسین آباد، ریاض، عادل نگر، فردوس،گلزار، گلستان، مسرت آباد، ملت آباد، منصورہ، ڈیرہ ایوب، عسکریہ، قائداعظم آباد، قائد آباد، کہکشاں، مدینہ پاکستان، استقلال، الجناح، پاک زار، دارالایوب اور نیا کراچی۔
یہ وہ سب نام ہیں جو وفاقی دارالحکومت اسلام آباد کے لیے پاکستانی شہریوں کی جانب سے تجویز کیے گئے تھے۔ مگر پاکستان کے دارالحکومت کے لیے ’اسلام آباد‘ کا نام کیسے فائنل ہوا اور یہ کس نے تجویز کیا تھا، یہ کہانی کافی دلچسپ ہے۔
ایوب خان کی فوجی حکومت نے اپنے قیام کے تین ماہ کے اندر ہی 21 جنوری 1959 کو ایک کمیشن کا تقرر کیا جس کے سربراہ چیف آف جنرل سٹاف میجر جنرل آغا محمد یحییٰ خان تھے۔
اس کمیشن کو یہ ذمہ داری تفویض کی گئی کہ وہ جائزہ لے کہ جغرافیائی محل وقوع، مواصلات، دفاعب و ہوا اور مناسب زرخیز علاقوں سے قربت کے پس منظر میں کراچی (ملک کا پہلا دارالحکومت) پاکستان کے دارالحکومت کے لیے مناسب اور موزوں ہے کہ نہیں۔
سنہ 1962 میں اسلام آباد کا ایک طائرانہ منظر
اس کمیشن کو یہ ذمہ داری بھی سونپی گئی کہ اگر وہ کراچی کو دارالحکومت کی حیثیت سے ناموزوں سمجھے تو وہ وفاقی دارالحکومت کے لیے کسی اور موزوں جگہ کی تلاش کرے۔
اس کمیشن نے فوری طور پر اپنے کام کا آغاز کیا اور مشرقی اور مغربی پاکستان کے تمام اہم مقامات کا ہمہ جہتی جائزہ لے کر دو جون 1959 کو اپنی رپورٹ صدر مملکت کی خدمت میں پیش کر دی، جس میں بتایا گیا کہ کراچی سمیت پاکستان کے کسی موجودہ شہر کی اس طرز پر منصوبہ بندی نہیں ہوئی ہے کہ اسے دارالحکومت بنایا جا سکے۔
کمیشن نے اپنی اس رپورٹ میں دارالحکومت کی حیثیت سے کراچی کو ’ناموزوں‘ قرار دیا اور تجویز کیا کہ دارالحکومت کے لیے مناسب ترین مقام راولپنڈی کے قریب پوٹھوہار کی سطح مرتفع کا علاقہ ہے، یہ مقام راولپنڈی کے شمال مشرق میں ایک وادی ہے جس کے شمالی سمت ہلال نما پہاڑیوں کا ایک سلسلہ پھیلا ہوا ہے۔
رپورٹ میں بتایا گیا کہ یہ وادی ’سید پور‘ کے نزدیک ہے اور اس وادی میں شاہ عبداللطیف (بری امام) کا میلہ بھی لگتا ہے۔
سید پور گاؤں کا ایک منظر
12 جون 1959 کو صدر مملکت نے اس رپورٹ کا جائزہ لینے کے لیے صوبائی گورنروں، وفاقی کابینہ اور اعلیٰ حکام کا ایک خصوصی اجلاس نتھیا گلی کے پُرفضا مقام پر طلب کیا جس نے کمیشن کی اس تجویز کو اصولاً منظور کرنے کا اعلان کر دیا اور چھ افراد پر مشتمل ایک کمیٹی قائم کی گئی جس نے 15 جولائی 1959 کو اپنی حتمی رپورٹ جاری کر دی اور اعلان کیا کہ اس نئے دارالحکومت کا رقبہ ایک سو مربع میل پر محیط ہوگا جس میں چودہ مربع میل میں پارلیمنٹ اور مرکزی دفاتر تعمیر کیے جائیں گے۔
ایوب خان کو اسلام آباد کی سائٹ پر شہر کی منصوبہ بندی کے حوالے سے بریفننگ دی جا رہی ہے
ابتدائی منصوبے کے مطابق اس نئے دارالحکومت کی کل آبادی تین لاکھ ہونی تھی اور یہ قومی امنگوں کا آئینہ دار ہونا بھی قرار پایا۔ یہ بھی اعلان کیا گیا کہ یہ نیا دارالحکومت دس سال میں تعمیر ہوگا اور اس کی تعمیر پر ہر سال پندرہ کروڑ روپے خرچ کیے جائیں گے۔
15 جولائی 1959 ہی کو اخبارات میں ممتاز کشمیری رہنما چوہدری غلام عباس کا ایک بیان شائع ہوا جس میں انکشاف کیا گیا تھا کہ پاکستان کے دارالحکومت کو منتقل کرنے کے بارے میں حکومت کا اقدام مستحسن ہے اور بانی پاکستان بھی دارالحکومت کو وادی پوٹھوہار میں منتقل کرنا چاہتے تھے۔ یہ الگ بات ہے کہ انھوں نے بانی پاکستان سے منسوب اپنے اس انکشاف کا کوئی دستاویزی حوالہ نہیں دیا۔
اب ملک کے اس مجوزہ دارالحکومت کا نام رکھے جانے کا مرحلہ درپیش ہوا۔ چند دن بعد اس سلسلے میں مجید نظامی کی ادارت میں لاہور سے شائع والے ہفت روزہ جریدے ’قندیل‘ نے ایک اعلان شائع کیا۔
پاکستانی شہریوں سے نئے دارالحکومت کے نام کے حوالے سے تجاویز مانگی گئیں اور انعام کا اعلان بھی کیا گیا
اس اشتہار میں کہا گیا کہ ’پاکستان کا نیا دارالحکومت راولپنڈی کے قریب تعمیر کیا جائے گا۔ نئی آبادی ہوگی اور لازمی امر ہے کہ اس کا کوئی نام رکھا جائے گا، آپ اس کا کیا نام تجویز کرتے ہیں، ہم آپ کا تجویز کردہ نام شائع کریں گے، اگر قارئین کرام میں سے کسی صاحب کا تجویز کردہ نام حکومت نے منظور کر لیا یا حکومت کی کمیٹی نے بھی وہی نام رکھا جو قارئین کرام میں سے کسی نے تجویز کیا ہو تو ان صاحب کی خدمت میں ادارہہ قندیل کی جانب سے ایک ہزار روپیہ بطور انعام پیش کیا جائے گا۔ اگر ایک سے زیادہ قارئین نے ایک ہی نام تجویز کیا تو ہم ان صاحب کا نام شائع کریں گے جنھوں نے سب سے پہلے ہمیں یہ نام بھیجا ہو گا۔‘
19 جولائی 1959 کو ہفت روزہ قندیل میں شائع ہونے والی ایک خبر میں بتایا گیا کہ اس اعلان کے جواب میں قارئین نے جو نام تجویز کیے ہیں ان میں وہ نام شامل ہیں جو اس رپورٹ کی ابتدا میں بتائے گئے ہیں۔
انھیں ناموں میں ایک نام ’اسلام آباد‘ بھی تھاجو سب سے پہلے پنجاب کے شہر عارف والا میں رہنے والے ایک سکول ٹیچر قاضی عبدالرحمن نے تجویز کیا تھا۔
قاضی عبدالرحمان
24 فروری 1960 کو فیلڈ مارشل ایوب خان کی صدارت میں ہونے والے وفاقی کابینہ کے ایک اجلاس میں تمام تجاویز کا جائزہ لیا گیا اور اعلان کیا گیا کہ وادی پوٹھوہار میں قائم کیے جانے والے پاکستان کے اس مجوزہ وفاقی دارالحکومت کا نام ’اسلام آباد‘ ہو گا۔
کابینہ کے اس فیصلے کا اعلان جناب ذوالفقار علی بھٹو نے کیا۔ انھوں نے اپنے ایک بیان میں کہا کہ اسلام آباد کا نام نہ صرف لوگوں کے جذبات کی ترجمانی کرتا ہے اور ان کی خواہشات کے مطابق ہے بلکہ اس سے مجوزہ دارالحکومت کو ایک واضح مقصد اور امتیاز بھی حاصل ہوتا ہے۔
مسٹر بھٹو نے مزید کہا کہ نئے دارالحکومت کی منصوبہ بندی نہ صرف پاکستان کی تعمیراتی انفرادیت ملحوظ رکھا جائے گا بلکہ اس کی تعمیر میں ان قدروں کو خاص خیال رکھا جائے گا جو پاکستان کے عوام کو عزیز ہیں۔ انھوں نے کہا کہ جب نیا دارالحکومت تعمیر ہو جائے گا تو پاکستان کے لوگ اس پر بجاطور پر فخر کر سکیں گے۔
سنہ 1976 میں پارلیمنٹ ہاؤس کی زیر تعمیر عمارت کا منظر
اُدھر ہفت روزہ 'قندیل' نے اپنا اعلان شائع کیا۔ مجید نظامی نے کوشش کی کہ قاضی عبدالرحمن کو ایک ہزار روپے کی انعامی رقم صدر مملکت یا کیپٹل کمیشن کے سربراہ جنرل یحییٰ خان کے ہاتھوں دلوائی جائے، مگر جب ایسا ممکن نہ ہو سکا تو خود ادارے نے یہ رقم براہ راست قاضی عبدالرحمن کی خدمت میں روانہ کر دی۔
11 مارچ 1960 کو قاضی عبدالرحمن نے صدر مملکت فیلڈ مارشل محمدایوب خان کو ایک خط لکھا جس میں بتایا گیا کہ 24 فروری 1960 کو منظور ہونے والا نام ان کا تجویز کردہ تھا۔
اس کے جواب میں 15 اپریل 1960 کو حکومت پاکستان نے قاضی عبدالرحمن کو ایک خط تحریر کیا جس میں کہا گیا تھا کہ صدر مملکت کے نام ان کا خط موصول ہوا جن کی ہدایت پر ان کا نام پاکستان کے اس مجوزہ دارالحکومت میں ایک پلاٹ پیش کیے جانے کے لیے درج کر لیا گیا ہے۔
اس خط پر فیڈرل کیپٹل کمیشن کے اسسٹنٹ ڈائریکٹر عبداللطیف کے دستخط تھے۔ (کیپٹل ڈیولپمنٹ اتھارٹی کا قیام یکم جون 1960 کو عمل میں آیا اور اس کے پہلے چیئرمین میجر جنرل یحییٰ خان تھے۔)
سی ڈی اے کی جانب سے لکھا گیا وہ خط جس میں ’اسلام آباد‘ کا نام تجویز کرنے والے قاضی عبدالرحمن کو پلاٹ دینے کا اعلان کیا گیا
قاضی عبدالرحمن یکم اکتوبر 1908 کو امرتسر میں پیدا ہوئے تھے۔ انھوں نے اپنی تعلیم کا آغاز گورنمنٹ ہائی سکول امرتسر سے کیا تھا اور تکمیل اسلامیہ کالج ریلوے روڈ لاہور سے کی۔ انھوں نے ضلع ساہیوال کے مختلف سکولوں میں طویل مدت تک تدریس کے فرائض انجام دیے اور 1968 میں بحیثیت ہیڈ ماسٹر ریٹائر ہوئے۔
ان کا ایک نعتیہ شعری مجموعہ ’ہوائے طیبہ‘ کے نام سے شائع ہوا تھا۔ وہ مختلف وقتوں میں اقبال فیروز الدین طغرائی امرتسری، ڈاکٹر ایم ڈی تاثیر اور مولانا ظفر علی خان سے اپنے کلام پر اصلاح لیتے رہے تھے۔ ان کی تحریریں زمیندار، اصلاح، چٹان، سیارہ، قندیل، نوائے وقت، سیارہ ڈائجسٹ اور اردو ڈائجسٹ میں شائع ہوتی رہی تھیں۔
قاضی عبدالرحمن اس خط کے لکھے جانے کے تیس سال بعد تک زندہ رہے۔ ان کی وفات 25 اپریل 1990 کو ہوئی مگر وہ زندگی بھر اسلام آباد کی انتظامیہ کی جانب سے صدر مملکت کے وعدے کے ایفا کے منتظر رہے۔