یہ اخلاقی بگاڑ محض داخلی معاملہ نہیں ہے، بلکہ یہ اس "الٰہی قانون" کو دعوت دے رہا ہے جس کا ذکر قرآن کریم میں حضرت ابراہیم علیہ السلام کی دعا کے جواب میں کیا گیا کہ اللہ کا عہد ظالموں اور نافرمانوں کو نہیں پہنچے گا۔ جب مرکزِ اسلام کی سرزمین پر اللہ کی حدود پامال ہونے لگیں، حرمین کے پاس تفریحی میلے سجنے لگیں اور مظلوم فلسطینیوں کے خون پر مصلحت پسندی کی چادر تان کر ظالم قوتوں سے پینگیں بڑھائی جانے لگیں، تو پھر قدرت کا تازیانہ حرکت میں آتا ہے۔ موجودہ دور میں ایران، اسرائیل اور امریکہ کے درمیان بڑھتی ہوئی جنگی کشیدگی اور عرب دنیا کا اس بھنور میں پھنسنا بظاہر ایک سیاسی بحران نظر آتا ہے، لیکن حقیقت میں یہ وہی "عذاب کا کوڑا" محسوس ہوتا ہے جس کا ذکر قرآن کی مختلف آیات میں نافرمان قوموں کے لیے کیا گیا ہے۔
تاریخ گواہ ہے کہ جب بھی مسلمان حکمرانوں نے اللہ کے دین سے بے وفائی کی اور دنیاوی جاہ و جلال کو اپنا قبلہ بنایا، اللہ نے ان پر بیرونی دشمنوں کو مسلط کر دیا۔ آج ایک طرف اسرائیل کا وحشیانہ ظلم ہے اور دوسری طرف امریکہ کی ریشہ دوانیاں، جبکہ ایران کے ساتھ بڑھتا ہوا ٹکراؤ پورے خطے کو راکھ کے ڈھیر میں بدلنے کی دھمکی دے رہا ہے۔ یہ تمام حالات اس تنبیہ کی عکاسی کرتے ہیں کہ اگر عرب معاشرے نے اپنی روش نہ بدلی، اپنی سرحدوں کے اندر فحاشی کے اڈوں کو بند نہ کیا اور مادی ترقی کے زعم میں اپنے رب کو بھلائے رکھا، تو یہ بلند و بالا عمارتیں اور مصنوعی چکا چوند انہیں اللہ کی پکڑ سے نہیں بچا سکے گی۔ قرآن کا یہ فیصلہ اٹل ہے کہ جب خوشحال طبقہ حد سے گزر جاتا ہے، تو پھر تباہی کا فیصلہ نافذ ہو کر رہتا ہے۔ وقت آگیا ہے کہ امتِ مسلمہ بالخصوص عرب دنیا اس مادی سحر سے نکل کر توبہ کی راہ اختیار کرے، اس سے پہلے کہ حالات واپسی کے راستے ہی بند کر دیں۔